بسم الله الرحمن الرحيم .

السلام عليكم ورحمة الله وبركاته .
0
0
0
0
0
0

مقدمه

يالله إن تمسيهم بالخير ... ويالله تصبحهم بالخير ... بصراحه مهناش مقدمه .. ولكن قلت اكتب هالخمبقه لعلى الله ينفع بها الأمتين العربيه والإسلاميه !! وعلى فكره ترا الموضوع ما فيه أيقونات لأني عاجز لأحط أيقونات بالعربي <<< ماودك تعطينا اللي عندك وتفارق




قبل كل شي أحب أقول لكم لا تدققون ببعض الحاجات لأنكم لو دققتوا راح تتعبون من جد لذلك خوذوني على قد عقلي ( أحسن ما فيه إنه يعرف قدره )


بصراحه يا جماعه صار لي ثلاث أيام وأنا طفشان مررررررره ومتكدر ولا ذقت نوم ولا ذقت أكل والحاله صعبه ... وكله بسب إن إسرائيل الله يمحاها ضربت قلب العشق .. قصدي قلب العرب النابض ( لبنان ) وخربت علينا الصيفيه !! .. أنا ماهمني بعض الحاجات أنا همتني أليساء اللي يقولون إنها جتها إصابه وهي عباره عن إغماءات متقطعه من آثار الروعه اللي صابتها من صوت الإنفجارات واللي كنت متفق معها على تصوير فيديو كليب بشهر فبراير القادم ( ترا مدري فبراير عدا ولا ما جاء للحين ) المهم اشوف المسيكينه خاطرها تصور معي .. تقول مليت من هالأسباني اللي كل يوم أصور معه وابيك أنت هالمره .. بس الله حق إنها قالت أبي التصوير يكون بحديقة حيوانات ولا أدري وش قصدها بصراحه !!



تخبرون الأخلاق قافله والنفس شينه ... قلت خلني أروح لحواري اللبنانين بالرياض كود أوسع صدري واتفرج عليهم طراه إن بعض الوجيه تفتح النفس و والله وتمسك واروح للشميسي حارة اللبنانيين ( قايل لكم لا تدققون ) ويوم مريت مع ذاك الشارع إلا ذيك اللبنانيه اللي عمرها 19 سنه تطرح الطيور اللهم يا كافي ويوم شفتها وألف عليها بالسيارة أبي أدعسها وهي توخر .. تصدقون إني دعستها إلا شوي .. ويوم تعديتها واريوس عليها أبدعسها بعد قالت العمى شو بك ؟! إبتسمت إبتسامه تقوطر مصاااااله وقلت لها كنت أمزح يابنت اللذين !! هي ما فهمتها وضحكت بعد وحسيت إنها إرتاحت لي وحبتني من جد !! .. قالت ممكن روح معاك شويي ناخذ شي فتلي ( لفه ) قلت أفا عليك والله .. إركبي بس وإذا ما شالك الونيت يشيلك الشفر !! وأنزل وافتح لها الباب علشان تركب ... مهوب إحترام لها ولكن الباب خربان ويالله وبالله ينفتح !! ويوم ركبت وشميت العطر اللي معها وتحوم كبدي لأني بحياتي ما شميت عطر ولا إستخدمته أبد !! واقوم واشغل المسجل على آخر شي ولا كنها موجوده معي !! ... وهي تقزني وهي فاقه خشتها وتقعد تصارخ بوجهي وانا يالله أسمع صوتها من صوت المسجل ويوم شفت وجهها طلع احمر واطفي المسجل قلت خير !! وش فيه !! قالت شو مالك ولا كني موجودي معاك ! ياخيي ئدر مشاعري !! قمت ودددددبجتها على الكتف بغيت أمصع كتفها يقال لكم إني اسلوب هالحين ... قلت وش إسمك ؟ قالت رولا كوسي !! قلت هلا والله بتك ياأم كوسه .. قالت وإنتا شو إسمك قلت حمودي .. قالت إنتا من مواليد برج شو ؟! قلت للأسف والله ما أعرف أتكلم روسي .. !! قالت .. أنا ماعم بسألك عن الحكي الروسي انا بسألك عن البرج ياللي إنتا إنولدت في؟ قلت أنا مولود بالبيت ماوُلدت في برج ! .. حامت كبدها مني و قالت أنا يا محاشيتك مولوده ببرج الحمل ... قلت أجل أنا مولود ببرج الثور !! وحسيت إنها خقت معي لأنها قالت شو كتيييير إنتا مهدوم ( مهضوم ) واستحيت منها وصفقتها على وجهها مخمس وقلت يابعد كبدي والله الحين أعشيك على حسابي ولا يهمك وبأحلى مطعم بالشميسي يارولا .. قالت لا بدي مطعم بالعليا .. قلت والله إنك تبطين وبعدين العليا كل أقاربنا فيها وأخاف يشوفنا أحد من العذال ونصير علكه بحلوق الناس ... وأحس إنها اقتنعت بكلامي ... ورحنا لمطعم صاد بالشميسي صح إنه يحوم الكبد من الوصاخه اللي فيه لكن أهم شي الأخلاق ! وجلسنا على طاوله وطلبت نص حبه شوايه بدون رز مهوب بخل ولكن خبركم اللبنانيين ما يحبون الرز ههههههه.. وحنا جالسين نتعشى مسكت معها على حنان قالت بتعرف ياحمودي إني من زمان لهلى وانا عم بدور على فارس أحلامي .. وشكلي لئيتو هالساعي !! ومن زود الدلاخه ما عرفت قصدها قلت يعني فارس أحلامك وأنتي بتصيرين حبيبته؟! .. قالت إي ياعمري ! والله وأطير عيوني فيها و أوقف واصفط لساني على تحت واعض عليه بسنوني قلت يابنت الكلــ ... وأدف الطاوله وينكب العشاء وكنت ناويها بصراحها ... وقاموا الباكستانيين اللي بالمطعم وفكوني عنها .. وقامت تصيح هي وفهمتني قصدها .. وخليتها هي اللي تحاسب عن العشاء جزاء لها ( العشاء قيمته 9 ريال ) وبعدها ركبنا بالسياره ودق جوالها صدفه وانا ما كنت أدري إن معها جوال وطلع ابوها يسأل عنها قالت شي ساعة زمان وبكون عنكم أنا ورفيئي ( اللي هو أنا ) ويوم قفلت السماعه قالت بتعرف حبيبي حمودي إني بكرهوا كتير كتير !! قلت من هو ؟ قالت بابيه .. قلت ابوك اللي هو كوسه ؟ قالت لا بابيه إسموا كارلوس ! قلت طيب وكوسه من هو ؟ قالت هاي إسمي التاني قلت ليه أنتم برازيليين ؟! قالت العمى شو برازيليين إحنا من لبنان ويوم جينا بيتهم إلا واهلها حاطين عشاهم حمص وتبوله وفتوش وسمبوسه مع إن هالشهر مهوب شهر رمضان لكن مدري من وين جابو السمبوسه !!ههههههههههههه قالت .. بيي .. مامي .. خيو انطوني .. خيتو هيلا .. خيتو عمشى !! شوفوا هاي صديئي ياللي حكيت إلكن عنو !! يوم قالت هالكلمه أنا أحتري إطلاق نار وإلا احتري يجيبون سكاكين ويقطعوني أثر الدعوه عندهم عاااااادي ولا فيه مشاكل .. لأن بعض الناس تفكيره واطي ويروح فكره بعيد وانا بصراحه راح تفكيري بعيد ( يعني أنت إنسان واطي ) والله واجلس أتعشى معهم مره ثانيه .. ويعلموني بسوالفهم وعلومهم كلها ... يا حبي لهم ما عندهم شي إسمه إنتقاد وخرابيط وحقوق !! .. أنا إذا كنت بمجلس عند ابوي وقمت أحكي عند الرجال خزني بعينه ثم ضيعت السالفه اللي اسولفها .. عكس هاللبنانيين الدعوه عندهم فررررري ودايم أقاطع حكي ابوهم وهو يحكي بنص السالفه وأغير الموضوع بعد ! ولا يعرفون سوالف ( شسمه الرجال ولا شسمه سالفته ) وقالوا لي إن ديانا حداد تقرب لهم قلت أنا أقرب لسعد جمعه وراشد الفارس وعبدالرب ادريس وجواد العلي !! ويوم خلصنا من العشا وبغيت أمشي من عندهم .. وتعطيني رولا سلسال عليه صليب قالت يالله ياعمري إلبسو !! قلت وجع هذا عليه صليب !! قالت وشو يا عمري إحنا مسيحيين !! يالله إلبسو من شان خاطري .. قلت من شان خاطرك نلبسه ولو تبين نلبس غوايش بعد ما عندنا مشاكل !! بس بشرط أنتي اللي تلبسيني السلسال و يوم جت تلبسني السلسال إلا واحس واحد يخنقني وأثره ابوي يقول ليييييش ما صليت صلاة العصر يا التيس الأربد ؟! أثر الدعوه كلها حلم في حلم ..




ما يستفاد من الموضوع :

1- يا شين نومة العصر .. والله ياهي تسبب أزمات وصدمات إذا قام الواحد وشاف الواقع !
2- الواحد لا يقعد يهايط على غير سنع وهو ما عنده إلا الدجه !



ان شاء الله تعجبكم القصه

حموووودي