عــــــــــــــــاتبوهــــــــا
بعد ماقابلتني عاتبوها
على شوف الحبايب حاسبوها
خذوها وابعدوها غصب عني
وعن وجهة طريقي جنبوها
وشالوها عن عيوني غصيبة
عواذل واغصبوني واغصبوها
خذوها من يديني شوف عيني
وعن عيني تعدوا واحجبوها
كلام وصدقوا بالبنت كذبة
وهم اللي من اول كذبوها
وهم وش دخلهم في مال لبن
لابوها والخلايق طالبوها
وفية ماتخون ولا تعاند
جسورة والمواعيد ارعبوها
ملاك كاملة والكامل الله
ولكن العواذل عذربوها
وهي كل ما دعتني تشتكي لي
عن اللي سالفتنا سربوها
تخاف وتلتفت مع كل كلمة
تظن أن العواذل راقبوها
تلفت من عقب ماهي جريئة
شجاعة ماتهاب وهيبوها
واهديها وانا حاير وثاير
مصيبة ياعذاب عذبوها
وهم كل ماخذوها عن طريقي
تراهم صوب قلبي قربوها
وانا ماتعبت قلبي خيانة
خيانة رتبوها وحسبوها
ولايعجز خفوقي لايقابل
جفا من حاربوه وحابوها
وأنا لي عزة تفرض علي
أخاطب بالجفا من خاطبوها
وأكسر لوحة الماضي وأزيله
وأخربها مثل ما خربوها
واذوقهم ندم ماصار فيها
وأشربهم من اللي شربوها
أدلعها واولعها بنفسي
وأشرقها بعد ماغربوها
وأعوضها عن اللي راح كله
وعن ذيك الليالي كل أبوها
غلاي بقلبها مر وتعدى
غلاها لأمها والا لأبوها
=====================================



التمثــــــــــــــــال
عفى الله عن غدر الخناجر والضلوع أبطال
باسامح واتركك تحت الظلام الحالك لحالك
دخيلك وفر دموعك ترى هدر الدموع ذلال
وترى مافيه احد يصبر مثل صبري بغربالك

أنا عيب على انقض كلامي والرجال افعال
وإذا قلت اقطع حبالك تراني باقطع حبالك
عشان اكسب هدب عينك تجرعت العذاب أشكال
وليتك ترأف بحالي علشان ارأف بحالك
مسوي في حياتي شي مايذكر ولا ينقال
حشا حتى العدر وهو العدو مايعمل اعمالك
تمسيني على الهم وتصبحني على الغربال
تقلطني فناجيلك وتقصر عني دلالك
تحملت التعب لأجلك وأنا حملي يهد جبال
رحلت من العذاب وماوقفت الا على جالك
علامك كلما اجيك متواضع جيتني تختال
معاك اليا متى باصبر وصبري معك يحلى لك
مثل مااقبلت لعيونك لزوم تلد لي باقبال
ومثل ماقد حشمتك حس واحشم قلبي أشوالك
انا محد بجابرني أساير معك هالمنوال
ترى لأني تبيع لك ولاني بأصغر عيالك
أنا جيت اعشقك نبض ومشاعر ماأعشقك تمثال
انا جيت اسكنك واحياك وأبقى فيك وأبقى لك
أنا جيت بظمى عاشق تعب يطرد سراب اللال
أنا جيت استفز رضاك من فرقاك والجا لك
أن ماهمت بك عاقل انا كنت اعشقك بخبال
انا ماكنت احبك حي انا كنت أعشقك هالك
تخيل من كثر ماخاف تلقى للزعل مدخال
اخاف أخطي على طيفك وادوس برجلي ظلالك
تبعتك والعرب تتبع رعود البارق الهمال
وصرت أقرب جسد يمشي معك باقفال واقبالك
أبي قلبك يحس انه فقد بمحبته رجال
ملكته من هدب عين وخسرت ارضاه باهمالك
صحيح ان الفراق اقسى ولكن الوصال محال
وأنا صعب على ارضى غرورك واضعف قبالك
بعد ماحققت عيني في بعدك للرقاد امال
اعود للسهر.... يااخوي فال الله ولا فالك
ببدل نظرتك فيني واجي لك كل يوم بحال
باكون اقرب من ثيابك عليك ولا اتهيالك
با المك وانثرك واجمعك وارجع انثرك باهمال
با اخونك وازعلك وارضيك وازعل منك وارضى لك
ابا ارسم بالثرى وجهك وابا ادفن صورتك برمال
ابا اشكي للعرب فرقاك واضحك عند عذالك
ابا اهديك الوصال فراق واهديك الفراق وصال
باسوي مثل مااشوفك تسوى وافعل افعالك
عشان تعرف من فينا الزعول ومن وسيع البال
ابيك تذوق فنجالي وانا باذوق فنجالك
نصيحة واحتفظ فيها قصر معك الزمن او طال
أبي تسمع كلامي زين وتحطه على بالك
إذا حبك هبال أطفال لك عندي هبال أطفال
ولا وابشر بعد بهبال حب ماهو هبالك
وإذا قصدك تهين اسمي عشان تشمت العذال
حشا لا انته ولا غيرك ولا عشره من اشكالك
==========================================


السفينـــــــــــــــــــــة
ضاقت وساع الفيافي والوعد متن السفينه
للطريق اللي دعاني بعد امان الله وامانه
لااتناديني وصوني قلبك الله لايهينه
لا يراهن في رجوعي لاجل مايخسر رهانه
ليه ماارحل عن غرامك بعد ماذقت الغبينه
اذكري لي شي واحد يستحق اقعد عشانه
قلب ماحن لوصالي ماني باجة حنينه
واشهد انه مايعزر بالرفيع الا هوانه
الهوى الغدار حد الله مابيني وبينه
والرجل لاخير فيه ان مافظ قدره وصانه
واحد مثلي اليا من حدته عوجا سنينه
ماشكى لاقرب ابن ىدم لوهو أغلى من اخوانه
يوم قلبي ماعصاك وماقدرتي تذبحينه
ليه خنتي فيه وانتي معه من نفس الديانه
كان ذبحي بيدك ارحم لي من اللي تفعلينه
وان طلبتك تذبحيني ماذبحتيني لعانه
كل جرح من جروي تذكرينه تنكرينه
كن مالك في نزيفه يد خانت بالامانه
ينزف الخافق تواضع لين لطختي جبينه
والا ماكنت ابيها توصل لحد الاهانه
قلت من باب الميانه صاحبك وتعذبينه
لعنبوك ارخي معاي شوي ماصارت ميانه
طعت عقلك يوم قيل عن العقل بالبنت زينه
لكن الشرهه علي اللي كنت أحسب إنك تكانه
من بعد ماكنتي انتي في حشاي أغلى سجينه
با اوعدك با اطلق سراحك واتهمني بالادانه
وين راي؟ لاي درب مايرجع للمدينه
ليه رايح؟ لان قلبك ماترك قلبي وشانه
كيف ابا انسى ربي اللي ملهم القلب السكينه
مثل ماعانه بقربك لا نوى فرقاك عانه
كان قاسي يجرح أطراف السكاكين السنينه
مايطيح وبنت مثلك حبها هزت كيانه
والا انا خابر خفوقي مايمد الا الثمينه
وإن بغى يغيض الثريا قعد القمره وزانه
مزل لاجلك هنوف رجت عقول رزينه
وان تهادت بالطريق الجرهدي تزهر جنانه
جادل كن الجمال قبلها كتف يدينه
والقمر لو شاورت له ينزح وتقعد مكانه
كانت أول من تحكم في فروع الياسمينه
وان تعدتهن تثنن خيزرانه خيزرانه
بعتها لاجلك وصارت لاصغر أطرافك رهينه
والا هي لفتة هدبها تغمزك ثقل ورزانه
والخفوق اللي تغذى من معزة والدينه
مشكلته إنه تعلق في زمن ماهو زمانه
كل مازادت جراحه واكتشف غلطة ضنينه
صدقيه أن قال مابه شخص يستاهل حنانه
يوم نادى يافلانه مارضيتي تسمعينه
لين صوت يافلانه...يافلانه... يافلانه

كنت أشوفك زعفرانه تقرض الورد وتدينه
يمكن إني ماقطعت بس أشوفك زعفرانه
كنت اهاب البعد عنك واطلبك لاتذكرينه
كان خوف من الفراق وخطوة الفرقا جبانه
مااقتنعت ان الخيانه للرجل تلوي يمينه
لين ماربي بعثك وذقت من طعم الخيانه
اسمحيلي مابقى فيني مكان تطعنينه
واقبلي من جوف قلبي كل عطفه وامتنانه
والله الله في عذابك با اتركك عينك بعينه
دلليه ولا يرده عن شقاك الا لسانه
والا أنا قررت اسافر وامتطي ظهر السفينه
لان مابه شي واحد يستحق اقعد عشانه



طمنوني أن شاء الله تنال إعجابكم