السلام عليكم ورحمة الله وبركاته.
اخواني اخواتي الافاضل اعضاء هذا المنتدى الموقر يشرفني تواجدي بينكم وعسى الله يجملنا.
اعزائي الكرام هذه اول مشاركه لي بهذا المنتدى عسى ان تنال على اعجابكم.



انبطت (القِربه) وطشّت ما فصدري منكتم
شكرا جزيلاَ للزمن . والتجربه . والانفعال

سطّر على بيض الورق وارعف عليها يالقلم
يبقى صغير ابليسها .والعز لله والجلال

بشر. وبالفطره لا صار (الغير معقول) انصدم
وتكبر براسي فكرة الزاهد وحب الانعزال

يا فوّهة بركانها فوحي . وثوري يا حمم
زيف التصنّع يكشفه بوح البديهه بإرتجال

تخالطت ملامحي . ضايق بهيئة مبتسم
تطغى مراسيم العزا على طقوس الاحتفال

انا وصلت مع الذنوب لمرحلة (غط النسم)
اظل . وارجع واهتدي . وانسى واعوّد للظلال

لولا القناعه ما يجي بالوقت اسياد وخدم
يا صاحبي واصعب طلب للمرء تغيير الخصال

والرميه المتمكنه . يا . بالعظم. يا . باللحم
ماهيب رمية واحدِ يرجف ليا شال النبال

يا سيدي . يا النابغه . يالفيلسوف . المحترم
ان قلتلك هذا محال . افهم ترى هذا محال

بأبسط بساطه يا أخي خل القمم لاهل القمم
ما تضيق دار بأهلها لوضاقت صدورالرجال

حل السؤال اهل الطمانه للطمانه تنخرم
استوعبه او مررّه . يبقى كذا حل السؤال

ما ينرسم وجه الردي . لو كان (دافنشي) رسم
او بالمفيد المختصر لا تآمن الجال الهيال

سلام يا وجه الثقه في وقت (سلّم واستلم )
سلام يا شيِ طرى . وسلام يا ذود الشمال

وسلام يالقوس اليتيم اللي فقد ريش السهم
وسلام يا بدر الدجى كامل ولله الكمال

هوبل يا راع ام الخفوف . وغن يا راع الغنم
اقطع شكوكك باليقين اللي يطمّ الاحتمال

كافخ بسبقك يا صقر . واكفخ وعلّيي يالرخم
و يا ذيب سلمى خلّها . الوقت ذا وقت الثعال

ابكيك يا اطلق شنب وابكيك يا كلمت (نِعم)
وابكيك يا شمس الضحى في حين آلت للزوال

لا قلت هبي يا رياح . اكيد رفرف يا علم
وإليا متحت من الدلو . الشكر كله للحبال

كان (اكثم الصيفي) حكيم . ومات والباقي حكم
تموت ناسِ بالبحر والمستفيدات الجبال

بهلول.. وإلا بهلوه؟ ركز معي لا تنّجم
اخاف تخطي البهلوه وتضحك بطاريك العيال

لو كل من وصّى وصاه وعلّم بخبله علَم
اصبح على قول المثل ما شفت بالدنيا خبال

الدفش راح بيدّها يوم الذكي منها سلم
إنهق ولا تقوى الحمل . وإرغي وشيلي يالجمال

برج العرب. ملك العرب؟!! من يقنع الصم البكم؟
لاهنت يا (فن الاشاره) كل شي وله مجال

ولكل حزّه لَبسها . وإرطن ليا شفت العجم
والكلمه بمنطوقها واظرب مثل ب(ابن الحلال)

نيّاتنا متخالفه يا رب زمزم والحرم
(والشك زايل) دارجه.. بس الحقيقه لا يزال

قبل انتهي يستوجب (التنويه) ما قبل الختم
صح الله لسان الزمن . والتجربه . والانفعال



; الشاعر/ سالم حمد العازمي