أنا جبتلكم اليوم قصيدة غزليهـ للشاعر ح ـآمد زييد وهي من أروع ما كتب في الغزل بنظري
وإن شاء الله تعجبكم

القصيده :المبآني

جابك الله من غياب ٍ ضيّق صدور المبــاني
قبل لا الوحشه تزعزع بيتك الصلب وتبيده

بيتك اللي من رحلت وكل جدرانه تعانــي
ماتحمل ينتظر شهــرين وعـيونك بعـيـده

الله العالم لو إنكـ جـيت متأخر ثوانــي
ماتشوف إلا بقايا من حصـاه ومن حـديـده

من عرفتك وأنت تايه من مواني لي مواني
وتارك ٍ قلبي مـولّع من وقيده في وقيـده

ضاعـت سـنيني أحـد بهـاليالي وتحدانـي
وأنـت ماتشـبع غياب ولاتخاف من النقيده

ودي أتحـمد لك الله بالسلامه , مامدانــي
كل ماتوصـل برحـله ترجـع برحله جديـده

دام تدري كـل وجـه ٍ غير وجه الله فـانـي
ياخي أكسـبلك ثواب وخـاف ربك في عبيده

كان فيني عيب قلي:فيني العيب الفلانــي
كان هـرجي مزعـلك في شـي قلي:لاتعـيـده

عيب تصغر في عيوني وأنت برقاب الغواني
كيف تستسهل طعوني وأنت خابرني وليده ؟

لعنبوك أن مت بيدك من يفكك من أخواني ؟
لحزنوا ربعي على فرقاي شاللي تستفيده ؟

أنت منت اللي عشقته أنت أكيد انسان ثاني
ليه صرت بهالبرود وبهالاحاسيس البليده ؟

وين حـبك للزعل .وين العناد الأولانــي ؟
وين حنّية زمان وفرحة العـمر الرغيـده ؟

وين ذاك اللي اليا أقبل مايبات إلا بمأني ؟
وين راح اللي الياأقفى مايروح ألا فقيده ؟
واحد ٍ من جابه الله بس يامر ويعـصـانـي
الوحيد اللي أخافه غصب وأمشي معه سيده

(مابغيت أطيح بيده) لـيـن ماربي بلانـي
ولا أنا لو هي بكيفي (مابغيت أطيح بيده)

ذاك بس اللي يامن جيته يـلخـبط كيانـي
اللـي بنظـره ينشـف دم قلبي في وريـده

قبل أشوفه أجمع اله أحلى القصايد والمعاني
وأن لقيته ماعرفت أقول لي جمـله مفيده

الف مره قبله أعد القصيده من لسـانـي
ولعنبوه أن جيت عنده قمت أخربط بالقصيده
أمدحه وأنا أدري أنه لو تباطاني نساني
أنطحه وانا أعرفه مجنون وأفكاره عنيده

من يسوي بي سواتك يالرهيف الاسمرانـي ؟
منهو من الناس غيرك غلطته ترفع رصيده ؟

من يقص(جناح طيرك)وأنت أعز أنسان جاني ؟
ليه أخاف(رماح غيرك)وأنت ضرباتك سديده ؟
ان تبعتك .أتبعك من طيبي وواسع بطانـي
ولا أنا لاجـيت أكيد انسـان عـزالله بكيده

أقدر أنزع لك ثيابي وألبس ثياب الأناني
وأقدر أطلع من عذابي والعب بدورك وأجيده
ومستعد أكسب رهاني لو بغيت أكسب رهاني
وأخدعك بحساس كاذب وأتحدى من يصـيـده

أبك أنا لي شفت خلّي حط غيري في مكانـي
والله إني لتركه وأن صد لعشق سيد سـيده

جيت مابيك تحقرني جيت أبيك تعز شاني
جيت أبي فزعة ظلوعك من مشاعرك البليده

خلني داخل (حدودك) وأجبر بخاطر زماني
أكذب بباقي (وعودك) وأصدق بلحظه سعيده

أنتشلني من (برودك) لو تولّع بالمحاني
عطني أحساس (بوجودك) وأخذ كل اللي تريد

تكفى واليا قلت :تكفى بيع خلق الله عشاني
لاتضيّع من يديني فرصة العمر الوحـيـده

يعلم الله شفت منك ومن غيابك ماكفانـي
كان ماتقدر تخفف هم قلبي !! لاتزيـده شف

غيابك وش يسوي بالصدور وبالمباني
وأنت تدري كيف كانت صدمت غيابك شديده

والله أنك لو وصلت البيت متأخر ثوانـي
مالقيت إلا بقايا من حصاه ومن حديده
وسلامتكم..

هاذي القصيدة وأبي أشوف أرائكم..

تحياتي : أم عذاب..