من يقول الزين مـايكــمل حــلاه ....... كل شـئ ٍ فـي حبـيـبـي اكـتـمـل
الله اللـي كـملـه والله عـــطــاه ........مابقى للـزيـن فـي خـلـي مـحـل
العيون أحلى مـن عـيون المـهـاه.........شافها قلبـي و صـفـق واحـتفـل
نظرته مـن فـتنـته شعـلـة حيـاه .........والجفون من الحيا فيـهـا كـسـل
ساهـم ٍ رمشـه علـى الخد وسناه ........ كِن لـمعـة وجنـتـه ورد ٍ وطـل
والشـفـايـا كنـها جمـر الغضـاه ..........تحرس الريق المحلى بالعـسـل
والشعر ليـل ٍ نقل حمـرة مســاه .........أجعد ٍ حول على صـدره هـمـل
مايج ٍ مـــن فوق متنـه ماطـــواه .........لون شلال ٍ مـع المـغـرب نـزل
انطلق جيده يمــاري فــي بهــاه .........فــوق ميـاس ٍ تـعـزل واعـتـدل
بالرشاقه فيــه من ظبــي الفلاه ..........لي مشى كنه على الريح انــتقل
ريحته من كـــل زهـــر ٍ منتقاه ..........و الزياده للخــزامــى و الــنفل
صافي ٍ مثل المطر فوق الصفاه ......... باسم ٍ مثل الــبشــايــر بالأمــل
جامع ٍ من كـــل زيـــــن ٍ منهاه ..........مستحيل الوصف في خلي سهل
كايد ٍ ماهو يلين لمن بغـــــــــاه ..........يرتفع عن كل سقطـات الــزلل