غربة خالد عبدالرحمن (( مخاوي الليل )) التي ترجمها في قصيدة (( في غربتي )) وانا قد نزلت القصيده في موضوع سابق ف مانيب حاب اذكرها مرة اخرى حتى ما اطول عليكم


لكن هذي القصيده آثارت عددا من الشعراء ليجاريها كل منهم بغربته وجراحه المدفونه
التي أشعلها مخاوي الليل في دواخلهم



وها أنا اقدم لكم ردود على قصيدة (( في غربتي )) للشاعر مخاوي الليل

اتمنى ان تعجبكم
=========
1-

رد على قصيدة (( في غربتي ))


هزت شعوري معانـي ذكرها زيني

..... ورديت من شافت عيونـــــــي معانيها

راح الفكـر يامخاوي الليل لسنيني

..... اللي مضت من حياتــــــــي زاهد ٍ فيها

ذكرتني اللـي على بالي وناسيني

..... اللي معه نبضة احساســــــــي معنيها

بيني وبينه مسافــــه وينه وويني

..... عزاي ذكرى الموده مــــــــــع لياليها

مرسالها الطيف لامنه لفـــى عيني

..... يطمّن الــروح فــــــي لحظة ويشقيها

ليت السعاده رهينة راحـــة يديني

..... واعطيك واعطي البشر باقي امانيها


2-

رد على قصيدة (( في غربتي ))


اشعلتها يــامـخــاوي اللـيـــل يكفيني

..... نـار ٍ بـقـلـبـي ثـمـان اسنين اطفيها

سمعت انا البيت الاقشر واشتعل فيني

..... جرحك وفجّر جـــروح ٍ كنت اداويها

لو كنت تدري بحالـــي كـنـت تبكيني

..... وان كـان حــالك تـهـون وماتطريها

دامك غريـب ٍ تصبر لـو هــي اسنيني

..... لابــد لك يــــوم راجـــــع . ثـم لاقيها

مـيـر الـبـلا مـــن توفت ويـنــه وويني

..... بـيـنـي وبـيـنـه ( ذراع ) ومااحاكيها

لـو لا الـعـقـوبـه حفرت القـبـر بيديني

..... ارمي كفنها واضـــــم الصدر ابكيها

يـوم العزى هـل دمع الموت من عيني

..... لـو هـلّ في روض نجد ٍ كان يرويها

يامخاوي اللـيـل قـل للـنـفـس فكيني

..... بـعـد الأمــــل رجعتك تقوى تهديها

عـزاه للــي يـبـي لـي مـــن يهديني

..... وش عــاد نفسي وأملها ميت ٍ فيها

صابر وابصبر الين الـصـبـر يشكيني

..... وابكي بعيني إلين الـدمـــع يعميها


3-

رد على قصيدة (( في غربتي ))


يامخاوي الليل زاد الـجــــرح جرحيني

..... ودمــوع عينك مـــن الفرقــــى تبكيها

كـثـيـر نــاس ٍ بـدرب الـحـــــب ماشيني

..... كـم واحـد ٍ فــي دمـــوع العين يرويها

غـيـرك جـروحــه سقتها دمـعـة العيني

..... يـبـكـــي ولكن ظـلام اللـيــــل يخفيها

قـبـلـــي وقـبـلك تـفـارق كـل غاليني

..... ســود اللـيـالـي سقتهـم مـــن بلاويها

كـم غـربـــة ٍ ضـيـعـت بالهجـر قلبيني

..... وضــاع الـوفـا والمحبه مــــع لياليها

واهـل الوفـا لــو يطول الوقت باقيني

..... ماغيرت مــــن حــيــاة الحب ماضيها

اصـبـرتصبر عـلـى فـــــراق المحبيني

..... دنــيــا المحبه لـقـا وافـــراق ينهيها

4-
رد على قصيدة (( في غربتي ))


ابكيتني يامخاوي الليل فـــي حيني

..... يوم ٍ سمعت اللي على بالك تطرّيها

ذكـرتـنـي يامخـاوي اللـيـل بسنيني

..... اللي في عمري مضت قمت اناجيها

محبوبتي فــي بادي الوقت تدعيني

..... واليوم انا عاجز مــن اللقيا الاقيها

تبكي الا غبت سـاعــــــه ماتناجيني

..... والحين لقيت بـدالـي مــــن يسليها

ياليت عمري معك اشكي وتشكيني

..... ترتاح نفسـي دقـايـق لــو تعنيها

لـو جـاك عـمـري هديـه يانظر عيني

..... وش عهوتي لــه اقــدم يامخاويها

يـاشــوق عـمـــري انـا لك لاتخليني

..... واحكي بغربه سنين ٍ يوم تطويها

عـــزاي بـصـبـر تـصبّـر يـامخاويني

..... الـصـبـر حكمه وكل الناس ترويها


5-


رد على قصيدة (( في غربتي ))


غـريـب وابـغـى بـدربـي من يخاويني

..... واسري معه عــــادة الغربه واخاويها

مالــي وطـن غـيـر مـحـبـوب ٍ يراعيني

..... نفسي على الـهـم والـغـربـــه تسليها

واذا لقيته قريــب . يـضـم نـظــر عيني

..... انسى هـمـوم ٍ ودنـيـــــا عايش ٍ فيها

وان غـاب عـنـي يـعـود الـهم ويجيني

..... واسامر لـيـالــــــــي القمرا واناجيها

مهمـا تـطـولـيـن مسافــه بينك وبيني

..... محبتك فـــــــــي صميم القلب داريها

ماانسى حبيب ٍ حلفت ماهو بناسيني

..... نساني الغربه وهموم ٍ كنت اخاويها
""""""""""""""""""""""""""""""""""

مـــع تمنياتي بالإستمتاع بروعة هذه القصائد التي فتحت جراح الكثيرين ...






تحيــــــ أخوكم / أبــو عــذاب ـــــــــاتي