اخواني .. أخواتي .. حياكم الله جميعاً :
طبعا تسمعون وتشوفون هالايام الجنون المتواصل بزيادة اسعار المواد الغذئية واسعار
النفط وبناء عليه مابقى شيء على سعره القديم والزيادة اضعاف مضاعفة .
طيب مقابل هالزيادة والجنون هذا ايش المطلوب منا << افدنا افادك الله
بصراحة بعد ماجلست مع نفسي جلسة مغلقة طلعت ( بحلول رهيبه ) وبما اني
مواطن عربي غيور والانانيه بعيده عني قررت نشر الحلول الرهيبه للجميع .
نبتدي بالحل الاول ( الغسالة ) بديلها ( الطشت ) وهو الصحن الكبيييير تبع أيام زمان
تقعد الزوجة وتخلي الطشت قدامها وهات يادعك وفرك وهنا له فوايد كثيرة
مثل رياضة للايدين بشكل عام وكذلك رياضة للرجلين ( يعني أرجل ) هذا غير
التوفير طبعا <<< أيباااه على الافكار . وبعدين لاتستحون مو في أغنية تقول
( الطشت قاللي ياحلوة يللي قومي استحمي ) ؟؟؟ البنات شكلهم راح يعصبون .
نجي للحل الثاني << هات واتحفنا هات . اللي عندهم عمالة بنغاليه وهنديه
يستغلون وجودهم من الحين ويطلبون منهم يلفون الشوارع والسكيك << جمع سكه
يعني الطرق الضيقه ويجمعون الخشب والكرتون ويخزنوها فوق السطح لبناء بيوت
لاولادهم أجيال المستقبل لما يكبرون << ياحلو هالمستقبل اذا الحاضر كذا أجل
كيف المستقبل ؟ وهذا طبعا بديل للبيوت الحاليه المكلفة واللي تهد الحيل .
اما الحل الثالث فهو ( المنظفات ) منظفات الملابس والكلوركس والشامبو والصابون ومطهر
الارضيات ومنظفات الصحون بالطريقة الاتية :
يتم استعمال نوعين منهم على اكثر احتمال يعني لما تبي تتحمم بلاش من البانيو
واستعمل الطشت علشان الماء يتجمع بالطشت واذا شفت ان ماء الاستحمام نظيف فمكن تغسل
فيه الملابس وبعد غسيل الملابس تستعمله لغسيل الارضيات وفي طريقة
اخرى وهي انك تتحمم وانت لابس ملابسك وهنا الفائدة فائدتين الله يسلمكم .
الحل الرابع وهذا الحل ممكن الواحد يصير من اصحاب الملايين بسببه , يعني
الواحد مننا يحول المأساة الى فايدة . بالمختصر اللي عنده حمار يحتفظ فيه ولو
يقدر يجمع أكبر عدد من الحمير يكون احسن علشان تكون بديل للسيارة . وطبعا تكون بنفس
طريقة مصانع السيارات يعني ماركات ومنافسة للتطوير. وبما اننا
تعودنا على الرفاهيه بركوب السيارات فما في مانع من ادخال بعض التحسينات على
الحمير وتزويدها ببعض المميزات مثل اللون وتركيب بطارية بطريقة فنيه واضافة
بعض الاضاءة للمشاوير الليليه << كل شي معمول حسابه . وايضا وضع ( هودج )
يعني كابينه . طبعا هذا الموديل للناس اللي على قد حالهم . اما الكبايريه فلهم حمير
بمميزات اكبر وكل شي بسعره يعني للاغنياء ممكن نعمل عربانه مزودة بكثير من
الرفاهيه ويجرها حمار بقوة عشرة حصان لأنه فشله واحد من كبار القوم وتشوفه
( مدلدل ) على حمار ورجلينه باينين بطريقة ماتليق فيه فهنا العربانة هي الحل
المناسب . طبعا في منكم راح يقول الكبايريه ما أثر في الغلاء اللي نعيشه الحين او
يمكن بعضكم يقول الاغنياء ماراح يقبلون يركبون حمير وماراح يقبلون بأقل من
الخيل !!! هنا أرد عليكم وأجاوب واقول انه الحمير راح تصير موضه والكل يمشي
ورى الموضه وغير هذا أظن الخيل ماراح تكفي لأن عدد الاغنياء عندنا ماشاء الله
أكثر من عدد الفقراء << متروكه لفهمكم . وعلشان تعرفون قيمة الحمير واهميتها
اقول لكم انه السيارة مهما كان موديلها حديث فراح يجي يوم وتصير قديمة واعطالها
كثيرة وراح تضطر تشتري غيرها اما الحمير في دائمة التجدد والتوالد وغير هذا
ممكن يكون عندك اكثر من موديلين او ثلاثة من الحمير وتركب اللي تبيه كل يوم << مين قدك
يلا عاد ياحلوين كل واحد منكم يورينا ابداعاته للتغلب على مشكلة الغلاء مثل ما انا
ابدعت ويوعدكم ربنا بعقل مثلي عقلي !!!!!
.:: منتديات شبكة اهل الجنوب : صفر 07 سبعه ::. 
العرض العادي
