ماني من اللي يكتب الشعر محتاج
الشعر يركع تحت رجلي واشيله
اصنف افكاره على حسب الاخراج
واللي تردت واجد اللي بديله
ولاهيض افكاري سوا لايجن لاج
في كبدي اللي من خليله عليله
عليه وجدي عد مادايجن داج
ابوالعيون الواسعات الكحيله
من يوم ماقفى وانا عاقد حجاج
ياويل قلب الخل لاقفى خليه
من ساحل الدوحه لياساحل العاج
لاقستها بالشوق تطلع قليله
من دون خلي حالت دروب وفجاج
ماتقطعه غير المهار الاصيله
واليوم ابنخا خيرهن عز الانتاج
عز الجواد اللي يشدك صهيله
قرطاج ماغيره مع الخيل (قرطاج)
يطوي مسافات الدروب الطويله
من يوم شفته قلت منعا للاحراج
يا اهل السبايا جنبوا عن سبيله
هو اللذي يستاهل الكاس والتاج
جزل الفعل سمن المكاسب حصيله
له فزتن لاسجها الجوكي وهاج
فزت شجاعن انتخت به قبيله
خذني على داره وعجل بالافراج
ياعل كبدي منه تشفي غليله
اما يولع عقب هالعنوه سراج
والا خساره ياعرب عنويتي له