يا خاطري .. سوق القصايد على شان
...... ترضي فؤادك بالقصيد وحروفه
ترضي فؤاد .. فلان وفلان وفلان
...... ترضي جميع اللي شكالك ظروفه
ونته غزير .. بالقوافي والأوزان
...... وكتابة القيفان ماهي كلوفه
كلن يقول .. انه من الحب تعبان
...... وكلن يقول إن الليالي نكوفه
وكلن يلوم الحظ .. ويقول خسران
...... وكلن يقول الوقت ما فيه روفه
ونا .. بنهاية وضعي العام انسان
...... ولا الله خلق للمرءقلبين جوفه
ناس .. تشيل حمولها فوق الأمتان .
..... وناس شماغه ماتشيله كتوفه
ناس تعيش .. أيامها هم وأحزان
...... وناس تطبل بالسعاده دفوفه
الخلق واحد .. لكن الحال شتان
...... كل على ماقيل يعزف عزوفه
ونا حزين .. وقاضي الليل سهران
...... دمعي على الخدين زايد ذروفه
ياللي تحسدوني .. على حب فتان
...... تقرون شعري يوم أوصف وصوفه
ماكنت أشوفه .. غير في بعض الأحيان
...... ولا كثير أحيان ما كنت أشوفه
عشقه .. يشب بداخل القلب نيران
...... عجزت أضمه والليالي تعوفه
هي كذا .. الدنيا على مر الأزمان
......قلب سعيد وقلب حزنه يلوفه