لا.. لا تقولين أنت حبي بدنيـاي
لا لا تزيديـن الجـروح العطيبـه

قولي نسيتك جافني وانس ذكـراي
خليني أنسى حسرتـي والمصيبـه

وقولي لي أنت العام شفّي ورجواي
واليوم وجدي خف ماينحكـي بـه

ياكودي أقنع وابتعد عنك برضـاي
ويصير مالي في حياتـي حبيبـه

لا تزعلين أرجوك من عظم بلواي
أسمعك ياروحي هـروج عجيبـه

أحاول أسلى مير ياصعب سلـواي
رغم إني أدري بالظروف الصعيبه

بيني وبينك حالوا عداك وعـداي
ولاني قريبٍ لك ولا أنتـي قريبـه

لاعـاد تنتظريـن للحـي ملفـاي
مادام صرتي لابن عمـك خطيبـه

أنا عزيز النفـس والعـز مبـداي
وجرح الهوى مخفيه محدٍ دري به

يشهد لي اللي عالمٍ فـي خفايـاي
إني شريف القصد ماجيـت ريبـه

ياليتهم يدرون هو ليـه مسـراي
هو ليه سلوة خاطري في شعيبـه

الوادي اللي فيه ذكـراي وغنـاي
هو سلوة الخاطر ولا ينصخي بـه

يا للأسف كنتي حياتـي ومعنـاي
من قبل تعطين ابن عمك غصيبـه

وكنتي ولا زلتي شقا النفس ومناي
بس اجتماع الشمل ماعاد لي بـه

حتى ولو قلتي بربّك وش الـراي
الراي كل إنسـان يقبـل نصيبـه

لكن يعين اللي له أمري وشكـواي
ولشهرة العشاق هـذي ضريبـه

من بريدي نقلتها لكم عساء
تحوز على رضاكم
وتقبلوو من مازن اجمل الامنيااات