أنا سـعودي




أنا سعودي عمري الحين عشريـن=توّي شباب وقلبي الطفـل خايـف
كنّي صويب الحرب في يوم تشرين=مابين هم وغـم والـرأس نايـف
أنـا سعـودي والمُعانـاة نصفيـن=نصف الديون ونصف قل الوظايـف
لأجل أتوظف لازم ابحث لي سنيـن=بين الرياض وبين جـدة وطائـف
وإذا لقيت ألقـى وعمـري ثلاثيـن=بالواسطـة بالملعنـة بالكـلايـف
والمشكلة لا قالـوا الراتـب ألفيـن=تبغـاه وإلا غيـرك ألفيـن هايـف
لا بالله إلا أبغاه هالحيـن هالحيـن=ولا أموت مـن النـدم والحسايـف
ثم بعدها أبغى أتزوج ومـن ويـن=من وين يافقر السنيـن العجايـف
مافيه غير القرض والقرض سكيـن=يقعد ثمان سنين في الظهر جايـف
والقرض بعده قرض وتصير قرضين=إلا قروضٍ فـي قـروضٍ ردايـف
وسوق التداول زوّد الجرح جرحين=أقتشّ كل اللّي بقى فـي القطايـف
أقتشّته أهـل الكـروش المُرابيـن=اللّي لهم لنـدن وسدنـي مصايـف
أقتشّتـه أهـل الفلـل والملاييـن=من كد سُكان العشـش والسفايـف
سوق التداول هو كمين المساكيـن=والله شايف وأغلب النـاس شايـف
العيب والله في (( البطانة)) بلا دين=هم حاجزٍ بين الملِـك والضعايـف
لا قال عبد الله عسى شعبنـا زيـن=قالوا بخيـر وقولهـم ذاك زايـف
هم حاسدين الشعب من لفتة الليـن=وإلا يبون الشعب يائـس وعايـف
وإلا يبـون الأكـل يسـار ويميـن=هُم أولاً والشعب فـي رقـم فايـف
لا يا بطانة يا حسـد يـا مجانيـن=حنّا ولانـا طيلـة العُمـر كايـف
لآل السعود أهل العطايا الكريميـن=أهل القلـوب الطيّبـات الصخايـف
لا ما تفرقنا الضعـاف السروقيـن=لا ماتفرقنـا الظـروف الحوايـف
لكن أملنا دايم ( بيـوم الاثنيـن )=لعـل بـه علـمٍ جميـل اللطايـف
أمّا ملِكنا صقـر سـرب الشياهيـن=فإنه أملنـا فـي زمـان الصلايـف
هو خادم البيتين نجـل السلاطيـن=أهل السيـوف الباتـرات الرهايـف
وأخوه سلطان القلوب ادعوا آميـن=الله يعـزّه عـد ساعـي وطايـف
بو خالد اللّي فعلـه يزيـن ويبيـن=لـه حبنـا وقلوبنـا لـه ولايـف
وأخوه نايـف لا وزنّـا الموازيـن=مالـت وفيهـا للغـلا وزن نايـف
وأخوه سلمان السعد وأحمر العيـن=حـلاّل عقـدات الأمـور العكايـف
وآل السعود وكُلّهـم داخـل العيـن=هم ذُخرنا هم فخرنا فـي الشرايـف
أنـا سعـودي بالاسـم والعناويـن=والسعْوده خذها غريـب الطوايـف
في وجهي أنواع النُظم والقوانيـن =وفي وجهه القانون راخي ورايـف
أنا سعودي والملقّب ( أبـو ديـن )=أموت وأحياء في ديـون ورجايـف
أغلّق اقصادي علـى عُمـر ستيـن= يا الله عليـك المنفعـة والخلايـف
أعمارنـا مابيـن ستيـن سبعيـن= وديوننـا مثـل الجبـال النوايـف
بالمختصر لأني سعودي ومن وين=؟؟من ديرة البتـرول والبـث لايـف
لأني سعودي بين ديـزل وبنزيـن= بس للأسف فقران جيعـان خايـف



الشاعر