اتركيني لوجه ربي وارحلي لا ترجعين
باكر الأيام تشهد كان مجنون بغرامك!

ما طلبت البعد عنك لكن انتي تطلبين
من يدك هذي لهذي مستحيل اكسر كلامك

اذبحي انسان حبك اطعني لا ترحمين
ملكك الوجد وخفوقه وين ما تبغي سهامك

وان لقيتي بي صعوبه وخايفه لا تدمعين
عندي الحل المناسب عن حلالك او حرامك

احفري حفره كبيره وانصبي فيها كمين
وواعديني بليل اسود يشبهك يشبه ظلامك!!

واصرخي الحق يا وجدي طيرك النجدي حزين
واكشفي خصلات شعرك وارمي عن وجهك لثامك

وغرقي الأرض بدموعك واتبعي دمعك بانين
والطمي خدك بدمعك شقي الجيب وحزامك

خل تهب النخوه فيني وافتكر ذيك السنين
وانطلق لك واتعزوا جاك اخو غزوه حسامك

ثار بركان البداوه والقبايل اجمعين
من يرد قحطان عنك والحزن والهم ضامك!!

والله اني غير اجي لك لو بها عمري الثمين
لو تكلفني حياتي روحي وكلي امامك

لبه قلبك لبه قلبك دونك السور الحصين
تذكريني ما خذلتك يوم اعلنتي خصامك

كيف ودموعك تنادي كل ايام الحنين
ابشري والله بفارس يجبرك يجمع حطامك

عندك! بجنبك! بقربك! واصلك لا تجزعين
قربت ساعة سقوطي افرحي ميت غلامك!!

زلة اقدامي فديتك زغردي لا تسكتين
حلمك الغالي تحقق وانتهى مزعج منامك

راح من كانت حياته بين يسر وبين لين
راح من كنتي تلومي والغبي عمره ما لامك

كملي مشوار موتي وادفني لا تستحين
ما يشوفك غير ربي خالقك منشئ عظامك

ما عتقتيني لوجهه!! تعتقيني لوجه مين؟
ادفني لا بارك الله في رمل يرفض مرامك

واوعديني ما تخلي قصتي للمغرمين
خوف قلبي يتبعوني واصبح القدوه بهيامك

ثم احصل كل عاشق يكره الحب ويدين
كل قصص ليلى وبثينه من عقب شوفة وسامك

ايه فزتي بكسر قلبي قبل فوزك بالدفين
والسبب يرجع لوشهو؟ بس من شان انفصامك!!

يوم القاك اتحبي لي يوم شكلي تلعنين
يوم عقلك تحكمينه يوم يخرج عن زمامك

يوم تتمني وجودي يوم عني تبعدين
يوم يا عمري احبك يوم فارق وش علامك؟


ما اتحمل كل هذا خلقتي من أرض طين
والله نفسيا تعبتك والبلى كله بصدامك

كنت اعرف ان المحبه ورد يحضن ياسمين
واكتشفت ان المحبه موت والجاني جذامك

كل مصيبه تهون عندي ما عدى جرح الجنين
وقلبي الطاهر طفوله جرحها اكبر مهامك

ليه اكتب لك قصيده واطلبك لا ترجعين
ما عجبني فيك أصلا غير نظرات وقوامك

ولا انتي ضلع اعوج منذكر في كل دين
ان عدلته لك تكسر وان تركته وش دوامك؟

صدقيني موتك ارحم لو بغيتي تفهمين
انا لو كنت بمكانك! يمكن اخنقتي بلثامك!!!

من بريدي
ونقلتها لكم عساء تحوز على رضاكم
وتقبلوووووووووو تحيات جنون الليل
ودمتم